كۇندەلىكتى ومىردە تۇتىناتىن تاۋارلارىمىز بەن بىزگە كورسەتىلەتىن ءتۇرلى قىزمەتتەردىڭ ساپاسىنا كوڭىلىمىز تولماي جاتاتىن تۇستار ءجيى كەزدەسەدى. كوپ جاعدايدا ەكى جاقتى كەلىسىلگەن كەلىسىمشارتتار اياق استى بولىپ, ءوز قۇقىمىزدى ءتيىستى دەڭگەيدە بىلمەگەندىكتەن كۇرمەۋى كوپ كۇردەلى ماسەلەلەرگە تاپ بولىپ جاتاتىنىمىز دا جاسىرىن ەمەس. تۇتىنۋشىلار وداعىنىڭ نەگىزگى مىندەتى ازاماتتاردىڭ قۇقىقتىق ساۋاتتىلىعىن ارتتىرىپ, ولاردى زاڭ شەڭبەرىندە قورعاۋ. ماسەلەن, قانداي دا ءبىر تاۋار ساتىپ الىپ ونىڭ ساپاسىنا كوڭىلىڭىز تولماسا, ياكي, سىزگە كورسەتىلگەن قىزمەتتىڭ ساپاسىنا قاتىستى نارازىلىعىڭىز بولسا, تۇتىنۋشىلار وداعىنا تىركەلىپ, ءوز تالاپ-تىلەكتەرىڭىزدى جەتكىزە الاسىز. ياعني, «تۇتىنۋشىلاردىڭ ۇلتتىق وداعى» اقۇ قىزمەتىنىڭ نەگىزگى باعىتتارىنىڭ ءبىرى ازاماتتاردى تاۋاردىڭ قاسيەتتەرى مەن ساپاسى, جۇمىستار مەن كورسەتىلەتىن قىزمەتتەر جايىندا تولىققاندى اقپاراتتاندىرۋ. ۇيىم ماماندارىنىڭ ايتۋىنشا ەلىمىزدەگى ساۋدا-ساتتىققا قاتىستى قىزمەت ساپاسىنا قويىلاتىن تالاپتاردى ءار ازامات بۇگە-شۇگەسىنە دەيىن بىلۋگە ءتيىس. ماسەلەن, ەۋروپا ەلدەرىندە بۇل قاتاڭ ساقتالادى. ويتكەن جاعدايدا تاۋار مەن قىزمەت ساپاسىنىڭ باسەكەگە قابىلەتتىلىگى ارتا تۇسپەك. تۇتىنۋشىلاردىڭ قۇقىعىن قورعاۋ سۇراقتارى بويىنشا ەل ۇكىمەتىنىڭ ءبىرىنشى ءماجىلىسى 2017 جىلدىڭ 4 شىلدەسىندە وتكەن بولاتىن. ول جەردە تۇتىنۋشىلاردىڭ ۇلتتىق وداعىنا ەڭ ءجيى قويىلاتىن سۇراقتار كوتەرىلگەن ەدى.
– ۇكىمەت ءماجىلىسىنىڭ ناتيجەسى بويىنشا تۇو-عا حات جولدانعان بولاتىن, ول حاتتا كوتەرىلگەن نەگىزگى ماسەلەلەر مىنالار: تەكسەرىس ناتيجەسىندە 39,8% بالالار ويىنشىقتارى قاۋىپسىزدىك ستاندارتتارىنا سايكەس ەمەس, ۇيالى بايلانىستىڭ ساپاسى جانە قۇرالداردىڭ نەگىزسىز ەسەپتەن شىعارىلۋى, وقۋ پارتالارىنىڭ قاۋىپسىزدىككە بايلانىستى سۇراقتارى, تۇتىنۋشىلاردىڭ قۇقىعىن قورعاۋ تۋرالى قوعامدىق كەڭەس قۇرۋ ماسەلەلەرى ايتىلعان. وكىنىشكە قاراي, بۇل سۇراقتاردىڭ ەشبىرىنە ماردىمدى ناتيجە شىقپاي وتىر. ءوز وتباسىنىڭ دەنساۋلىعىنا نەمقۇرايلى قارامايتىن ءار ازامات ءوزىنىڭ نە تۇتىنىپ جۇرگەنىن, جەپ جۇرگەن تاعامىنىڭ قۇرامىن, ساپاسىن, زيانى مەن پايداسىن بىلۋگە مىندەتتى. ءبىز تۇتىنۋشىلاردىڭ تالعامى تۇرعىسىنان, تاۋاردىڭ فيزيكا-حيميالىق كورسەتكىشتەرىن, سونىمەن قاتار ءىرى سۋپەرماركەتتەرمەن ۇسىنىلاتىن ساتۋ جەتەكشىلەرى جايلى اقپاراتتى زەرتتەيمىز, ءدام تاتۋ جانە تۇتىنۋشى ساۋالنامالارىن جۇرگىزەمىز. تۇتىنۋشىلاردىڭ قۇقىعىن بۇزاتىن وكىلدەردىڭ جاۋاپكەرشىلىگىن ارتتىرۋ, ارىزدىڭ باعاسى كولەمىندە داۋدى شەشۋ, باس تارتقانىنا ەرىكتى تۇردە الدىن الا ايىپپۇل قاراستىرۋ, تۇتىنۋشىنىڭ دەنساۋلىعى مەن ومىرىنە زيان كەلتىرگەنى ءۇشىن ارىزدىڭ باعاسىنىڭ 5 ەسە كولەمىندەگى ايىپپۇل سالۋ سياقتى ماسەلەلەردى كوتەرىپ وتىرمىز. سەبەبى, ازاماتتاردىڭ ساپالى ءومىرى – قوعامدى العا جەتەلەيدى – دەيدى «تۇتىنۋشىلاردىڭ ۇلتتىق وداعى» اقۇ پرەزيدەنتى سۆەتلانا رومانوۆسكايا.
زاڭگەرلەر مەن ۇيىم وكىلدەرى كۇندەلىكتى ومىردە ءار ادام تۇتىنۋشىلاردىڭ قۇقىعىن قورعاۋ سالاسىندا قازاقستان رەسپۋبليكاسىنىڭ نورماتيۆتىك-قۇقىقتىق بازاسىنداعى جاڭالىقتاردان ۇدايى حاباردار بولىپ وتىرۋى كەرەكتىگىن ايتادى. سوندا عانا تۇتىنۋ نارىعىنداعى ساپالى جانە قاۋىپسىز تاۋارلاردى, قىزمەتتەردى پايدالانۋعا مول مۇمكىندىك اشىلادى. وسىلايشا, ءار قوعام مۇشەسى تۇتىنۋشىلار, كاسىپكەرلەر مەن مەملەكەت اراسىندا وركەنيەتتى قارىم-قاتىناستىڭ قۇرىلۋىنا سەپتىگىن تيگىزەر ەدى.
ارمان وكتيابر,
«ەگەمەن قازاقستان»
الماتى
